Brynjar Níelsson er harðorður í garð Gunnars Smára Egilssonar, leiðtoga Sósíalista, í nýjustu færslu sinni og líkir Sósíalistaflokknum við nasista og stalínista: „Maður á kannski von á því að gamlir stalínistar og nasistar fari að kvarta til lögreglu yfir neikvæðri umræðu um þeirra hugmyndafræði. Þeir voru í sósíaliskri verkalýðsbaráttu eins og Gunnar Smári.“
Talsverð umfjöllun hefur verið í kjölfar skemmdarverka sem unnar voru á húsnæði Sósíalistaflokkins auk hótunar sem beindist að formanni flokksins og fjölskyldu hans. Pistlahöfundi þykir Gunnar Smári vega hart að sjálfstæðismönnum í umræðunni og gefur sér að þegar Gunnar Smári vilji láta rannsaka hatursorðræð áhrifafólks að þá eigi hann við að sjálfsstæðismenn eru áhrifafólkið. Brynjar heldur áfram og fullyrðir að sjálfstæðismenn séu ekki ofbeldismenn og beinir spjótum sínum að sósíalistum og heldur áfram máli sínu til stuðnings: „Snýst allt um að niðurlægja andstæðinginn eins og kommúnistar gerðu við milli- og yfirstéttina, sem þeir kölluðu fyrrverandi fólk og nasistar gerðu á sínum tíma við gyðinga þegar þeir létu þá í öll skítverkin.“
Sjálfstæðismaðurinn lýkur svo erindi sínu með orðunum: „Þegar skoðaður er málflutningur sósíalista þá sést vel að hann hefur ekkert breyst í heila öld. Alveg sama ofstækið og heiftin og menn skulu ekki halda að það verði eitthvað öðruvísi nú en áður ef þeir komast til valda.“