Gærdagurinn hjá lögreglu var nokkuð rólegur ef marka má dagbók lögreglu. Engar upplýsingar um nóttina hafa borist enn sem komið er. Tilkynnt var um þjófnað á hóteli í hverfi 108, lögregla rannsakar málið. Skömmu síðar barst lögreglu tilkynning um slagsmál í Laugardal. Þegar lögregla mætti á vettvang kom í ljós að um heimilisofbeldi var að ræða.
Tvö útköll voru í miðbæ Reykjavíkur í gær. Annað vegna innbrots í geymslu og hitt vegna grunnskólakrakka sem ráfuðu ölvuð um miðborgina. Íbúum Kópavogs var heldur brugðið í gær þegar lyklar að bifreið voru settir inn um glugga á heimili þeirra. Húsráðendur könnuðust ekki við bíllyklana og stóð bifreiðin fyrir utan húsið. Málið er í rannsókn hjá lögreglu. Þá hafði lögregla afskipti af ölvuðum manni í Kópavogi og veitti honum aðstoð.