Team Rynkeby Ísland hjólreiðahópurinn leggur á morgun af stað í hringferð um landið, ferðin er til styrktar Styrktarfélagi krabbameinssjúkra barna (SKB).
Lagt verður af stað frá Barnaspítala Hringsins kl. 10 á laugardagsmorgun í lögreglufylgd. Rósa Guðbjartsdóttir, formaður SKB og bæjarstjóri Hafnarfjarðar, mun hala ræðu áður en hópurinn hjólar af stað.
Hópurinn ætlaði í árlega hjólreiðaferð frá Danmörku til Parísar í Frakklandi, en sökum kórónuveirufaraldursins varð ekki af þeirri ferð, og var því ákveðið að hjóla innanlands í staðinn.
Hjólreiðahópurinn mun hjóla 850 km í kringum landið og stendur ferðin til 11. júlí. Unnt er að heita á hópinn með því að hringja í styrktarnúmerin:
907-1601 1.500 kr.
907-1602 3.000 kr.
907-1603 5.000 kr.
Team Rynkeby er stærsta evrópska góðgerðarverkefnið, þar sem þátttakendur hjóla á hverju ári 1.200 km leið frá Danmörku til Parísar til styrktar langveikum börnum og fjölskyldum þeirra. Team Rynkeby Ísland var stofnað árið 2017 með það að markmiði að hjóla í söfnunarátaki Team Rynkeby til styrktar SKB. Á síðastliðnu ári söfnuðust 23,6 milljónir króna.
Sjá einnig: Team Rynkeby hópurinn kom hjólandi til Guðna Th.