Kristján Þór Júlíusson, sjávarútvegs- og landbúnaðarráðherra, skipaði Hrönn Jörundsdóttur í embætti forstjóra Matvælastofnunar (MAST) í gær, hefur hún störf 1. ágúst.
Átján umsóknir bárust um starfið, en umsóknarfrestur rann út þann 4. maí. Hæfnisnefnd mat fimm umsækjendur vel hæfa til þess að gegna starfinu. Í kjölfarið boðaði ráðherra þá í viðtal þar sem ítarlega var farið ofan í einstaka þætti starfsins og sýn umsækjenda. Var það mat ráðherra, að Hrönn væri hæfust umsækjenda til að stýra MAST til næstu fimm ára.
11 ára reynsla hjá MATÍS
Hrönn er með BS gráðu í efnafræði frá Háskóla Íslands og lauk MS-prófi í umhverfisefnafræði árið 2002 frá Stokkhólmsháskóla. Árið 2009 lauk hún einnig doktorsgráðu í umhverfisefnafræði frá Stokkhólmsháskóla en auk þess hefur hún unnið hjá MATÍS undanfarin 11 ár.
Frá árinu 2016 hefur hún verið stjórnandi hjá MATÍS þar sem hún hefur stýrt fjölmörgum innlendum og alþjóðlegum rannsóknarverkefnum, stefnumótun, rekstri og ráðgjafarverkefnum.