Jóhann Gunnarsson, knattspyrnuþjálfari, sakaði um helgina KSÍ um að mismuna leikmönnum.
Jóhann Gunnarsson, þjálfari kvennaliðs Þórs/KA, var mjög ósáttur með tap liðsins móti Þrótti þann 29. júlí í viðtali við mbl.is. Ekki einungis var hann ósáttur við spilamennsku liðsins heldur var hann gríðarlega ósáttur með KSÍ. Forsaga málsins er sú að tveir af bestu leikmönnum liðsins eru að spila á HM sem fer fram þessa stundina. Jóhann vill meina að KSÍ komi ekki til móts við þær eða Þór/KA í þessu máli og hefur liðið ekki fengið neinum leikjum frestað.
„Ef þær komast upp úr riðlinum og í 16-liða úrslit þá yrði það frábært fyrir þær en hrikalegt fyrir okkur. Þessir tveir leikir sem við höfum spilað án þeirra hefðu ekki átt að fara fram. KSÍ stakk okkur illa í bakið með það og mismunar félögum mjög illa. Við skiljum það ekki og fáum engin svör af hverju þetta er svona,“ er meðal þess sem Jóhann sagði.
Hægt er að lesa nánar um málið hér
Mannlíf hafði samband við KSÍ um helgina til að fá þeirra hlið á málinu. Rúmum tveimur sólarhringum síðar hefur ekki borist svar frá KSÍ.