Baráttukonan og ritstýran Margrét Friðriksdóttir skilur ekkert í því hvers vegna öllum sjónvarpsþáttum hennar, Hin hliðin, hafi verið eytt skyndilega. Hún segist engar skýringar hafa fengið á hinu dularfulla hvarfi og biður aðdáendur sína um að bíða þolinmóðir á meðan hún finni útúr hvarfinu.
Margrét barðist hatrammlega gegn sóttvarnaraðgerðum íslenskra stjórnvalda í kórónuveirufaldrinum. Til þess stofnaði hún vefsvæðið frettin.is sem hlaut skráningu sem fjölmiðill. Margrét tekur einnig þátt í alþjóðlegu rannsókn um gagnsemi bólusetninga og hún reyndi ítrekað að smitast af veirunni, meðal annars með því að sleikja glös dætra sinna þegar þær voru veikar af Covid-19.
Ritstýrunni fannst vefsvæðið ekki duga í baráttunni og hóf hún þá gerð sjónvarpsþáttanna þar sem einblínt var á sögur fólks sem glímir við alvarlegar aukaverkanir eftir bólusetningu gegn kórónuveirunni. Margréti finnst afar grunsamlegt hvers vegna þættirnir voru fjarlægðir af streymisveitunni Uppkast án útskýringa.
„Þetta er allt hið undarlegasta mál. Forsvarsmaður streymisveitunnarsvarar hvorki skilaboðum né símtölum hvers vegna þættirnir voru teknir út. Helstu viðmælendur mínir er fólk sem er að glíma við alvarlegar aukaverkanir eftir bólusetningu, og því óhjákvæmilegt að spyrja sig að því hvort það sé orsökin fyrir að þættirnir eru skyndilega fjarlægðir án útskýringa og menn hlaupnir í felur,“ segir Margét og fullyrðir jafnframt að hún sé hvergi nærri hætt sjónvarpsþáttaframleiðslunni:
„Við á Fréttinni að vinna í því að setja upp eigið stúdíó og rás þar sem þessir þættir verða birtir, ásamt nýju efni og viðmælendum og verður það birt á næstu vikum. Þessar aðstæður munu ekki stoppa okkur, heldur styrkja. Með ósk um skilning og þolinmæði í undarlegum kringumstæðum.“