Í nýjum pistli segir þingmaðurinn fyrrverandi Brynjar Níelsson frá þungum bagga.
Fjölmiðlar virðast vera dragbítur á íslensku samfélagi að mati Brynjars Níelssonar, fyrrverandi þingmanns Sjálfstæðisflokksins. Þar kvartar hann yfir þeim fjármunum sem ríkið setur í rekstur RÚV en að sögn Brynjars eru það tæpir sjö milljarðar. Þá sleppa einkareknir fjölmiðlar ekki.
„…og nokkur hundruð milljónir til svokallaðra einkarekinna fjölmiðla, sem deila má um hvort sumir hverjir geti talist fjölmiðlar. En hvað erum við að fá fyrir alla þennan pening og er það þess virði?“
Kvartar Brynjar yfir því að eini fjölmiðillinn sem stundi rannsóknarblaðamennsku sé áróðurspési, án þess þó að nefna þann fjölmiðil á nafn. Hinir miðlar séu mest að greina frá ástarslitum og að endurflytja efni af samfélagsmiðlum. Þá gerir hann ástarmál Sveins Andra að umtalsefni en hann hætti nýverið í sambandi með Önnu Maríu Hákonardóttur.
„Hvernig skyldi nú peningarnir nýtast sem skattgreiðendur leggja einkareknum fjölmiðlum til. Þar er að finna fjölmiðil sem hefur talið sjálfum sér í trú um að stundi rannsóknarblaðamennsku en er bara áróðurspési fyrir skaðlega pólitík sem berst hatrammlega gegn tjáningarfrelsi annarra. Flestir aðrir miðlar eru bara að segja okkur um upphaf og slit ástarsambanda fólks sem fáir eða enginn veit hver eru, nema vera skyldi Sveinn Andri. sem við allir öfundum. Flest á þetta fólk sameiginlegt að tolla ekki út árið í þessum ástarsamböndum. Að öðru leyti endurflytja þeir efni úr samfélagsmiðlum og helst það ómerkilegasta sem þar er að finna.“
Hægt er að lesa allan pistil Brynjars á samfélagsmiðli hans hér fyrir neðan.