Nóttin var með rólegra móti samkvæmt dagbók lögreglu. Einhverjir ólátabelgir höfðu verið að vandræðast um klukkan hálf tólf á tjaldsvæðinu í Laugardal. Lögreglan var kölluð á staðinn og aðstoðaði tjaldverði við að koma ró á svæðið svo gestir svæðisins gætu sofið rótt.
Rétt fyrir miðnætti hringdi starfsfólk skemmtistaðar í miðbænum og óskaði eftir aðstoð lögreglu. Þá hafði stúrinn og svolítið þver gestur hreiðrað um sig og neitað að yfirgefa staðinn. Lögreglan kom til aðstoðar og ræddi við þennan heimakomna gest.
Klukkan hálf tvö í nótt kviknaði í bifreið í Hafnarfirði. Lögreglan mætti ásamt vösku liði slökkviliðsins. Eldur bifreiðarinnar átti ekki roð og hörfaði undan eldvarnartrixum slökkviliðsins.
Tveir þjófnaðir í verslunum borgarinnar voru tilkynntir. Í annarri tilkynningunni fylgdi að þjófurinn hafi urlast og ráðist á starfsmann búðarinnar. Lögreglan fór með hann í skýrslutöku og svo var honum sleppt lausum.