Kristjana Björg Sveinsdóttir ver orðanotkun Guðbjargar Pálsdóttur, formanns félags íslenskra hjúkrunarfræðinga, sem hélt eldræðu á Arnarhóli í gær.
Heimir Karlsson, þáttastjórnandi Í bítið á Bylgjunni, kvartaði í morgun yfir orðum Guðbjargar Pálsdóttur, sem hélt þrusuræðu á Arnarhóli í gær, frammi fyrir hátt í 100.000 konum. Orðin sem fór fyrir brjóstið á Heimi, voru „Fuck feðraveldið!“ en Kristjana Björg Sveinsdóttir, kennari við Menntaskólann við Sund, varði orðaval Guðbjargar í færslu á Facebook í morgun. „Ég nota FOKK orðið þegar mér sýnist. FOKK OFBELDI. FOKK FEÐRAVELDIÐ. FOKK STRÍÐSGLÆPIR. FOKK SPILLING. FOKK HITT OG FOKK ÞETTA. Ég vel þó hvort ég blóta í hljóði, yfir kaffibolla með vinafólki og fjölskyldu, ein í bílnum eða með 100.000 konum á Arnarhóli,“ skrifar Kristjana og heldur áfram: „Reiði er tilfinning sem þarf að fá útrás og þá er stundum nauðsynlegt að blóta, jafnvel bara í hljóði. Það kemur líka í veg fyrir ofbeldi að tala um reiðina og finna henni heilbrigðan farveg.“ Þá hvetur Kristjana fólk til að fagna málfrelsinu og tala upphátt um þá hluti sem eru tabú.
Að lokum segir Kristjana að til séu góð íslensk blótsyrði sem mætti alveg brúka ef þörf krefði. „Til fjandans með kúgun og OFBELDI og ekki líða það nokkurn tímann í nokkurri mynd!“