Knattspyrnufélagið Valur sendi frá sér tilkynningu um Séra Friðrik.
Sagnfræðingurinn Guðmundur Magnússon hefur sent frá sér nýja ævisögu um Friðrik Friðriksson, en hann var oftast kallaður séra Friðrik, og í henni greinir sagnfræðingurinn frá því að séra Friðrik hafi káfað á 11 ára dreng í sunnudagaskóla. Í bókinni er haft eftir manni á áttræðisaldri að aðrir piltir hefðu upplifað slíkt hið sama.
Áfallið er mikið fyrir marga en séra Friðik hefur verið dásamaður af þjóðinni áratugum saman og eru tvær styttur af honum í Reykjavík og sýnir önnur þeirra séra Friðrik með ungum dreng. Þá eru tengsl hans við Val svo sterk að spyrja Valsmenn oft „Hvað þætti séra Friðriki um þetta?“
Knattspyrnufélagið hefur sent frá sér yfirlýsingu vegna málsins en hann er hægt að lesa hér fyrir neðan.
„Saga Knattspyrnufélagsins Vals og Séra Friðriks er samofin á margan hátt í þau 112 ár sem félagið hefur starfað. Í fjölmiðlum í gærkvöldi og í dag hafa komið fram alvarlegar ásakanir á Séra Friðrik.
Það er erfitt að lesa frásögn sem lýsir hegðun sem er andstæð öllu því sem að Knattspyrnufélagið Valur stendur fyrir. Hugur félagsins er hjá viðkomandi.
Knattspyrnufélagið Valur fordæmir allt ofbeldi í hvaða mynd sem er og kappkostar í öllu starfi sínu að Hlíðarendi sé öruggur staður fyrir þá sem þangað koma.
Fyrir hönd aðalstjórnar Vals.
Hörður Gunnarsson Formaður Knattspyrnufélagsins Vals.“