Lárus Guðmundsson, veitingamaður á Rossopomodoro við Laugaveginn, virðist réttlæta skotárás á bíl borgarstjóra, Dags. B. Eggertssonar, í færslu á Facebook. Hann segir Dag bera ábyrgð á ljótustu árásum sem hafa átt sér stað í sögu Reykjavíkur. Árásum sem hafi splundrað fjölskyldum. Hvaða árásir eru það? Jú, lokun Laugavegsins, samkvæmt Lárusi.
Lárus skrifaði færsluna síðastliðið föstudagskvöld en Guðmundur Franklín Jónsson forsetaframbjóðandi deilir færslunni í gærkvöldi. Lárus skrifar: „Þessi mynd er tekin í hádeginu kl.12.25 fimmtudaginn 28. janúar, það skiptir raunverulega ekki máli hvenær hún er tekin, miðborgin og Laugavegurinn alltaf tóm bæði af fólki og bílum. Nú er mikið talað um aumingja borgarstjórann og þann hrylling sem hann virðist upplifa,“ segir Lárus og deilir mynd af svæðinu fyrir utan veitingastað hans Rossopomodoro, sem má sjá hér fyrir neðan.
Lárus heldur áfram í færslunni: „En þegar betur er rýnt í hlutina þá var aðeins ráðist á bílinn hans sem betur fer. En allir duglegu kaupmennirnir og veitingamennirnir sem hafa unnið langa vinnudaga, og allt gôða fólkið sem hefur lagt mikið af mörkum að gera miðbæinn og Laugaveginn að þeirri flottu götu sem hún var, það talar enginn um ljótustu árásir sem hafa átt sér stað í sögu Reykjavíkur.“
Lárus segir Dag bera ábyrgð á stanslausum árásum á kaupmenn við Laugaveginn. „Hundruðir duglegs vinnandi fólks hefur misst vinnuna sína útaf borgarstjóra sem er alveg sama um þau öll og þeirra fjölskyldur. Ég veit um nokkur dæmi þar sem fjölskyldur hafa hreinlega flosnað upp vegna framferðis borgarstjóra og hans liðs. Að lokum vil ég segja að alvöru borgarstjóri hefði sagt; það er ekki hægt að horfa uppá þetta lengur, við sem erum á móti bílum við skulum stoppa þessar árásir og ekki valda þessu góða fólki sem hefur lagt sig alla fram um að gera Laugaveginn að því sem hann var. Það er lágmarkskrafa þeirra sem hafa verið með allar þessar árásir á kaupmenn, veitingamenn og starfsfólk þessara staða, OPNIÐ FYRIR UMFERÐ STRAX!!! Og keyrum niður Laugaveg allavega framyfir covid!!!”
