María nokkur sýndi lipur tilþrif í tilsvörun í gær þegar hún pakkaði saman konu sem gerði athugasemd við auglýsingu hennar eftir húsnæði fyrir ungt par. Samskipti kvennanna má finna í hverfisgrúbbu Laugarneshverfis á Facebook.
Þar auglýsti María eftir húsnæði fyrir ungt par sem hún þekkir. Bæði drengurinn og stúlkan sem um ræðir eru 17 ára gömul og hafa verið í sambandi frá 15 ára aldri. Svona hljóða auglýsing Maríu.
„Ég þekki ungt og reglusamt par sem langar til að taka fyrsta skrefið á leigumarkaði eftir áramót. Þau eiga einn lítinn hund sem kann hvorki að gelta né að fara úr hárum og er því vel húsum hæfur. Parið hefur búið hjá mér og fjölskyldunni í eitt og hálft ár og ég get fullyrt að þau eru meira en tilbúin að spreyta sig á að búa sjálf. Þau fara vel með peninga, ganga vel um og það er engin óregla á þeim,“ segir María og heldur áfram:
„Þau gera ekki miklar kröfur á rými. Eitthvað nógu einfalt hentar þeim mjög vel svona fyrst um sinn, á meðan hægt er að útbúa mat, þvo þvott og fara í sturtu eru allir sáttir. Vinsamlegast hafið samband í skilaboðum ef þið vitið um eitthvað huggulegt handa þessu fína pari.“
Katrín nokkur svaraði síðar færslu Maríu en hún var í svari sínu alls ekki að bjóða fram leiguhúsnæði sitt. Þess í stað fann hún sig knúna til að gera athugasemdir við plan unga parsins. „Stúlkan bara 17 ára, og parið búið að búa saman í eitt og hálft ár. Kmin í sambúð rúmlega 15 ára. Sjálfsagt góðir krakkar en ansi ung til að vera í sambúð,“ segir Katrín.
Þessu svaraði María um hæl. „Heyrðu, þetta er alveg rétt hjá þér. Ég ætla að segja þeim að hætta við allt saman,“ segir María.