„Þær reglur gilda að þetta er skattfrjáls vinningur og rennur óskiptur til vinningshafa,“ segir Pétur Hrafn Sigurðsson, upplýsingafulltrúi Íslenskrar Getspár, um einn stærsta lottóvinning sem nokkur Íslendingur hefur hreppt í sögu lýðveldisins. Þá verður vinningurinn greiddur út í einu lagi. „Já, vinningurinn verður greiddur út í einu lagi eftir fjórar vikur,“ segir , upplýsingafulltrúi Íslenskrar Getspár.
Öllum vinningshöfum sem hreppa fyrsta vinning býðst ráðgjöf sérfræðing á vegum Íslenskrar Getspár og hefur sá heppni, sem er fjölskyldufaðir á fertugsaldri í Reykjavík að sögn upplýsingafulltrúa þegið boðið. Hinn ljónheppni milljarðamæringur sem um ræðir vann þannig 1.2 milljarða í Víkingalottói nú í þessari viku en miðinn var keyptur gegnum lotto.is og mun vinningurinn vera svo stórfelldur vegna kerfisbreytinga á lottókerfinu sjálfu.
„Allir sem fá hærri vinninga, allt frá 7 til 9 millónum króna, fá boðun um ráðgjöf. Þessi vinningshafi hefur þegið það.“
En í hverju ætli ráðgjöf Íslenskrar Getspár sé háttuð í grófum dráttum? „Það er svo margt sem huga þarf að við slíkan vinning,“ segir Pétur Hrafn jafnframt. „Þó vinningurinn sé skattfrjáls þá þarf til dæmis að tilgreina vinninginn á skattaskýrslunni. Það eru alls kyns þættir sem koma til, hvar á að geyma peninginn og svo framvegis.“ Íslensk Getspá veitir þó ekki nákvæma fjármálaráðgjöf og segir upplýsingafulltrúi að þær upplýsingar séu bundnar algerum trúnaði.
Komið hefur fram í íslenskum fjölmiðlum að vinningshafinn er íslenskur fjölskyldufaðir á fertugsaldri. Ætlar sá hinn sami að gefa upp nafn sitt eða óskar fjölskyldufaðirinn ljónheppni að njóta opinberrar nafnleyndar? „Hann nýtur nafnleyndar,“ segir Pétur Hrafn að lokum. „Það er þá ekki nema hann sjálfur vilji gefa sig fram. Þá gerir hann það bara. En hann nýtur nafnleyndar af hálfu Getspár“.