Skömmu fyrir klukkan tíu í gærkvöldi var lögregla kölluð út í hverfi 108. Segir í dagbók lögreglu að skemmdarverk hafi verið unnin á vettvangi en engar frekari lýsingar eru gefnar. Einn maður var handtekinn á staðnum og gisti hann bak við lás og slá. Í sama hverfi, um hálftíma áður, hafði lögregla mætt á veitingastað þar sem einstaklingur pantaði sér mat og borðaði án þess að geta greitt fyrir.
Það var nokkuð rólegt í miðbænum en lögreglu barst tilkynning um innbrot rétt fyrir átta í gærkvöld. Síðar um kvöldið var rafskútu ekið á bifreið og var annar ökumaðurinn látinn gista á Hverfisgötunni. Í Kópavogi mætti slökkvilið og lögregla á vettvang þar sem gámur stóð í ljósum logum. Slökkvilið sá um að ná tökum á eldinum. Nokkrir voru stöðvaðir vegna gruns um akstur undir áhrifum vímuefna en tveir þeirra höfðu áður verið stöðvaðir vegna þessa og voru því ekki með ökuréttindi.