Ekið var á dreng á reiðhjóli í gærkvöldi. Hann var fluttur með sjúkrabíl á bráðamóttöku þar sem meiðsli reyndust minniháttar. Fyrr um kvöldið var lögregla kölluð út vegna þjófa í matvöruverslun. Þjófarnir voru yngri en 18 ára og var málið því afgreitt með aðkomu foreldra. Maður lét illa í verslun seint í gærkvöldi og var lögregla kölluð til vegna hans. Maðurinn hafði ónáðað fólk og neitað að yfirgefa verslunina. Ekki kemur fram í dagbók lögreglu hvort maðurinn hafi verið handtekinn.
Þá ók lögregla heim karlmanni eftir að kvartað hafi verið yfir hegðan hans inni á veitingastað. Maðurinn hafði meðal annars rifið sig úr að ofan og má ætla að fólki hafi ekki verið skemmt vegna uppátækisins. Ábending um hugsanlega ölvaðan ökumann barst lögreglu. Þegar lögregla fann viðkomandi reyndist hann í lagi. Tveir aðrir voru handteknir vegna gruns um akstur undir áhrifum áfengis. Annar þeirra olli umferðaróhappi og gisti bak við lás og slá.