Helga Vala biðlar til uppljóstrara eins og Báru að halda áfram þrátt fyrir niðurstöðu Persónuverndar

„Kæru uppljóstrarar, viljið þið gjöra svo vel að halda áfram að koma upp um hvers kyns lögbrot og ósæmilega hegðun,“ skrifar Helga Vala Helgudóttir, þingmaður Samfylkingarinnar á Facebook í kjölfar úrskurða persónuverndar vegna Klaustursupptakanna.

Helga Vala segir úrskurðinn fullan af „djúsí dómatilvísunum“ sem siðanefnd Alþingis geti stuðst við í máli Klaustursfólks.

Persónuvernd komst að þeirri niðurstöðu að Bára Halldórsdóttir sem tók upp samtal Klaustursþingmanna hafi brotið persónuverndarlög vegna lengdar upptökunnar.

„Úrskurðurinn segir jafnframt að Bára hafi brotið ákvæði persónuverndarlaga vegna hinnar löngu upptöku en segir jafnframt að vegna ástæðu upptökunnar, það hvernig klausturfólk, sem opinberar persónur, talaði um annað fólk á opinberum stað geri það að verkum að henni verður engin sekt gerð því tilgangurinn með upptökunni helgaði meðalið,“ skrifar Helga Vala.

Hún segir Klaustursmálið sambærilegt lögbannsmáli Glitnis á Stundina „hvað varðar að það má auðvitað ekki leka upplýsingum úr bankanum enda hvílir bankaleynd á slíkum gögnum, en þær upplýsingar sem birtust í fjölmiðlum voru þess eðlis að talið var að almenningur ætti ríka hagsmuni af að fá þær fram í dagsljósið. Hefðum við haft upplýsingar um þann sem lak hefði viðkomandi líkast til verið „sóttur til sakar“ með sama hætti og Bára, en þá líkast til ekki verið gert að greiða sekt eða taka út refsingu, eins og Bára.“

Ekki missa af þessum

Annað áhugavert efni

Nýjast á Mannlíf.is