Grínistinn og leikarinn Chris Rock er að sögn áhugalaus yfir sáttarbeiðni leikkonunnar Jada Pinkett Smith en eiginmaður hennar, leikarinn og rapparinn Will Smith sló grínistann á Óskarsverðlaunahátíðinni eins og frægt er orðið. Kinnhesturinn er orðinn frægari en sá sem Gunnar Hámundarson á Hlíðarenda gaf konu sinni, Hallgerði Langbrók á sínum tíma.
Jada notaði tækifærið á dögunum í spjallþættinum Red Table Talk sem hún sér um ásamt dóttur sinni og móður, og biðlar til Chris Rock um sættir. „Varðandi Óskarsnóttina, ég vona innilega að þessir tveir greindu, hæfileikaríku menn fái tækifæri til að ná bata, tala um þetta og sættast. Vegna ástands heimsins í dag, þurfum við á þeim báðum að halda. Og við þurfum í raun enn meira á hvoru öðru að halda um þessar mundir. Þangað til að þetta verður hægt munum við Will halda áfram að gera það sem við höfum gert síðustu 28 árin og það er að halda áfram að reyna að skilja þetta sem kallast líf, í sameiningu.“
Leikkonan Vivica A. Fox gagnrýndi myndskeiðið frá Jada í spjallþættinum Wendy á tilfinningaþrunginn hátt og sagði í upphafi að það sé erfitt fyrir hana að segja þetta: „Þetta er samstarfsfólk mitt. Ég hef leikið í kvikmyndum með þeim báðum,“ sagði hún og átti við Smith hjónin. „Þegar ég sá myndskeiðið í gærkvöldi, þá grét ég, ég verð að vera hreinskilin við ykkur. Hana skorti algjörlega sjálfsábyrgð en Will var að verja heiður hennar er hann sló Chris,“ sagði leikkonan en Chris Rock hafði sagt brandara um skallann á Jada en hún þjáist af sjúkdóminum blettaskalla. Brandarinn var að flestra mati afar saklaus en það er önnur saga. Hún hélt áfram: „Ég elska þetta fólk, ég hef fylgst með börnum þeirra vaxa og dafna en ég hefði viljað sjá hana taka meiri ábyrgð á málinu.“
Samkvæmt heimildum etonline.com hefur Chris Rock lítinn áhuga á sáttarbeiðni Jada Pinkett Smith.