Gréta María rangfeðruð

Ein helsta stjarna viðskipta á Íslandi er Gréta María Grétarsdóttir, fyrrverandi
framkvæmdastjóri Krónunnar, sem nú starfar sem framkvæmdastjóri nýsköpunar hjá Brim
Viðskiptablaðamenn Fréttablaðsins eru upprifnir vegna Grétu Maríu og réðust í það verk að ættgreina hana í þaula og í löngu máli. Fullyrt er fyrir það fyrsta að faðir hennar sé sá barnlausi Grétar Mar Jónsson skipstjóri, sem setið hafi á Alþingi fyrir Frjálslynda flokkinn á árunum 2007 til 2009. „Á þingi talaði Grétar Mar ötullega fyrir frjálsum handfæraveiðum og breytingum á fiskveiðistjórnarkerfinu …,“ segir á viðskiptasíðu Fréttablaðsins þar sem áréttað er að Gréta María eigi ekki langt að sækja áhugann á sjávarútvegi. Líklega er greininni ætlað til að hnjóða í hana fyrir að starfa fyrir risafyrirtæki í sjávarútvegi og smána  þannig hugsjónir föður síns. Vandinn er sá, eins og kemur fram að framan, að Grétar Mar á ekki börn. Faðir Grétu Maríu er aflakóngurinn og togaraskipstjórinn Grétar Már Kristjánsson sem lengi var skipstjóri á Gylli ÍS frá Flateyri. Þangað má reyndar rekja áhugann á sjávarútvegi …