Rósa vill þögn

Rósa Björk Brynjólfsdóttir, alþingismaður Samfylkingar, er mikil baráttukona á ýmsum sviðum og sannur feminísti. Hún sést þó ekki alltaf fyrir og vill hafa stjórn á orðum fólks og skoðunum umfram það sem lög ná til. Nýjasta útspil hennar er að hún vill samblástur gegn fjölmiðlum fyrir að segja frá andláti einstaklinga sem hafa vafasama fortíð. Þannig vildi hún samstöðu gegn þeim fjölmiðlum sem sögðu frá andláti Larry Flynt, útgefanda klámblaðsins Hustler. Þegar ómenni deyja eiga fjölmiðlar að þegja! Áður hafði Rósa borið fram frumvarp um að þeir sem uppvísir yrðu að því að mæra þýsku Nasistana eða helförina með einhverjum hætti  myndu sæta ábyrgð að lögum og yrðu dæmdir í fangselsi í allt að tvö ár. Ekki var boðað að lagabreytingiin næði til annarra fjöldamorða eða stríðsglæpa sögunnar. Samfylkingin, undir fararstjórn Rósu, er á góðri leið með að verða hjarta skoðanalöggæslu í landinu …