Eitt fallegasta hús Akureyrar er nú til sölu. Um er að ræða elsta hús Oddeyrarinnar, gamla Gránufélagshúsið.
Fram kemur í frétt akureyri.net, að húsið hýsi nú veitingastaðinn Eyr og pítsastaðinn Austur – Pizza bar.
Eigandi hússins, Róbert Häsler, en hann er einnig rekstraraðili veitingastaðanna sem eru í húsinu, segist hafa viljað sjá hvort einhver áhugi væri fyrir húsinu. „Þetta eru bara þreifingar. Húsið er stórt og býður upp á fjölbreyttari rekstur en þann sem er hér núna. Það væri gaman að fá enn meira líf í þetta stóra og mikla hús, maður veit aldrei nema einhver þarna úti sé með góða hugmynd,“ segir Róbert.
Segist Róbert ekki sjá fyrir sér að veitingastaðirnir sem í húsinu eru, séu að fara þaðan, heldur mun frekar að nýjir eigendur fái leigusaming með í kaupunum.
„Það er auðvitað allt samkomulagsatriði. Eitt er víst að þetta hús býður upp á marga möguleika. Það er ótrúlega fallegt, vel við haldið og á besta stað í bænum,“ segir Róbert.
Gamla Gránufélagshúsið við Strandgötu 49 var byggt árið 1880 og er sem fyrr segir, elsta húsið á Oddeyrinni.
Fram kemur í fasteignaauglýsingu frá fasteignasölunni Hvammur, að húsið, sem eru heilir 606,7 fermetrar að stærð, hafi verið endurnýjað mikið síðustu þrjá áratugina. Miklar endurbætur voru gerðar á því árið 2013 og það sett í það form sem það er í dag. Á jarðhæðinni er gólfhiti og allar raf- og vatnslagnir voru endurnýjaðar árið 2013. Þá var gler endurnýjað og húsið málað að utan árið 2018.