Áhrifavaldurinn Björn Steinbekk vill fá umbun frá íslenska ríkinu fyrir alla þá landkynningu sem hann hefur staðið fyrir undanfarin ár. Hið sama vill hann að aðrir áhrifavaldar hljóti sem hafa tekið þátt í að markaðssetja Ísland.
Björn vill að áhrifavaldar fái í raun svipaða ívilnum og til að mynda kvikmyndaiðnaðurinn hefur hlotið hér á landi. Skoðun sína setti hann fram í pistli þar sem hann fjallar um mikilvægi áhrifavaldanna.
„Áhrifavaldar eru jafn misjafnir og þeir eru margir en það er óumdeilt að þeir hafa, flestir, áhrif. Þetta er oft fólk sem skrapar saman aur til að ferðast. Persónulega hef ég reynslu af því að kynna landið mitt og finnast ég eiga skilið einhverja umbun fyrir. Drónaskapur minn við eldgosið í Geldingadölum barst fólki um allan heim og fór ég í fjöldann allan af viðtölum við erlenda fjölmiðla og miðlaði efni mínu, oft án endurgjalds til stórra miðla um allan heim,“ segir Björn og ítrekar að fyrir vinnu sína hafi hann fengið lítið fyrir.
„Áætlað virði umfjöllunar um gosið erlendis er meira en 50 milljarðar. Samt er það svo að ég hef aldrei heyrt frá Visit Reykjanes sem notið hefur þess að hafa eldgos á svæðinu, fyrr en í vikunni þar sem ég er beðinn um að útbúa myndefni, frítt, fyrir þau að birta, til að fagna því að eitt ár er liðið frá því að gosið hófst.“
Björn hefur viðrað hugmyndina um ívilnanir fyrir áhrifavalda við Lilju Alfreðsdóttur viðskiptaráðherra. Hann vill að Ísland verði fyrsta landið í heiminum til að umbuna áhrifavöldum með ríkisstyrkjum.
„Ég tók þetta upp við hana Lilju vinkonu mína um daginn og henni leist bara mjög vel á þetta. Við eigum að vera fyrsta landið í heiminum sem segir bara: Þið eruð bara velkomin. Við viljum vinna með þessu fólki. Þetta fólk hefur vægi. Með þessu er hægt að stórefla umfjöllun og taka í leiðinni í burtu hluta af þessu óþolandi betli andskotans áhrifavaldana sem eru að selja íslenska drauminn,“ segir Björn.