Bryndís Schram spyr netverja hvort nornaveiðum gegn eiginmanni hennar, Jóni Baldvin Hannibalssyni, fyrrrverandi utanríkisráðherra, fari ekki að ljúka. Hann sé kominn á níræðisaldur og verið sé að taka hann hreinlega af lífi.
Jón Baldvin hefur verið ákærður fyrir kynferðisbrot. Þá stigu Ragna Björg Björnsdóttir 72 ára, Sigurbjörg Jónsdóttir og Elísabet Sif Helgadóttir stórt skref og í fyrsta sinn stigu þær fram opinberlega og svöruðu Jóni Baldvini fullum hálsi, undir nafni og mynd.
Konurnar eiga það sameiginlegt að vera óumdeildar. Sigurbjörg var 15 ára nemandi í Hagaskóla þegar hún segir að Jón Baldvin, kennari hennar, hafi áreytt sig gróflega og farið ítrekað á fjörur við sig. Tugir kvenna hafa sömu sögu að segja. Jón Baldvin segir þær ljúga allar. Meðal þeirra sem segjast vera fórnarlamb Jóns Baldvins er Aldís Schram, dóttir hans, sem hann er nú í meiðyrðamáli við.
Bryndís segir að öllum mögulegum brögðum hafi verið beitt til að koma höggi á eiginmanninn og fjölskylduna. Það gerir hún í færslu á Facebook. „Er ekki komið nóg? Hversu lengi eiga þessar óendanlegu, árangurslausu nornaveiðarnar að standa yfir á Jóni Baldvini og hans fjölskyldu? Hingað til hefur öllum mögulegum og ómögulegum brögðum, sem og nútímagöldrum verið beitt, en vitanlega án árangurs. Árangur þeirra, sem breiða vilja út í allar áttir og viðhafa illmælgi í garð ástvina Jóns Baldvins, hefur vitanlega engan árangur borðið,“ segir Bryndís ákveðin og bætir við:
„Uppskeran sem sagt engin þar á bæ.Tilgangur aðfararinnar að JBH virðist vera sá einn að ófrægja og hreinlega taka lifandi mann á níræðisaldri af lífi. JBH er í senn lands- og heimskunnur fyrir farsæl störf á sínu lífsskeiði, í þágu samferðafólks síns og viðurkenndur sem slíkur.Alþýðuhjónin Jón Baldvin og Bryndís hafa sannarlega sýnt í orði og verki, að vera afburðagóðir einstaklingar, sem blessunarlega rugluðu sínum reytum saman á unga aldri, landi og þjóð til heilla.“