Það er komið í ljós að það er tvöfalt dýrara fyrir foreldra barna í höfuðborginni að senda barn sitt, nú eða börn, í tónlistarskóla heldur en í mörgum öðrum sveitarfélögum landsins.
Margir tónlistarskólar á landinu eru meira en yfirfullir og þurfa því að hafna fjölda nemenda sem vilja læra í þeim.
Kristinn Örn Kristinsson, skólastjóri tónlistarskólans Allegro, segir í samtali við Fréttablaðið að skólagjöld í Reykjavík séu almennt hærri en í öðrum sveitarfélögum:
„Eftir hrun lækkuðu styrkir til tónlistarskóla um 20 prósent í Reykjavík, þá hvarf sellódeildin okkar. Það var rætt um tímabundinn niðurskurð en hann stendur óhaggaður.“
Helgi Grímsson er sviðsstjóri skóla- og frístundasviðs Reykjavíkurborgar, og hann segir að ekki hafi fengist fjárheimild til að taka aftur niðurskurð framlaga til tónmenntaskóla eftir hrun; bendir á að í Reykjavík stundi meira en 500 nemendur tónlist í gegnum skólahljómsveitir; en þar sé kostnaður á hvern nemanda miklu mun lægri en í tónlistarskólum – eða sem nemur um 33.000 krónum.
Hann segir að allur kennslu- og stjórnunarkostnaður sé greiddur af Reykjavíkurborg. Að árleg niðurgreiðsla fyrir hvert barn í einkanámi í tónlist sé um það bil 600.000 krónur. Og að vandamálið sé að sumir tónlistarskólanna í borginni séu litlir; stjórnunarkostnaður og annar rekstrarkostnaður hár.
„Það eru okkur vonbrigði hve skólagjöldin eru orðin há. En borgin byggir á áratuga hefð, að skólarnir séu sjálfstætt starfandi.“