Fyrrverandi formaður Knattspyrnufélagsins Hauka í Hafnarfirði, Ágúst Sindri Karlsson, er alls ekki sáttur við orð Viðars Halldórssonar formanns Fimleikafélags Hafnarfjarðar, sem sendi bæjaryfirvöldum í Hafnarfirði harðort bréf vegna fyrirhugaðrar byggingu knattspyrnuhúss Hauka að Ásvöllum. Í bréfinu nefnir Viðar að fyrir þá 4,5 milljarða króna sem hann fullyrðir að Haukar muni fá vegna byggingarinnar, mætti til dæmis byggja 4 leikskóla.
Ágúst Sindri, sem er ansi hreint liðlegur skákmaður, hefur nú blandað sér í umræðuna um bréf Viðars.
Segir Ágúst Sindri að Viðar fari með rangt mál:
„Það hefur aldrei verið Viðars styrkur að segja satt og rétt frá. Tilboð í húsið er 3,4 ma. þar af kemur lóðasala með 1,25 ma. Þannig að þetta eru nettó 2,2. Uppbygging á Kaplakrika 2007-2013 nam 3-4 ma kr. þar af voru keyptar dýrustu lyftingargræjur fáanlegar. Síðan fengu þeir gefins íþróttahús. Svo kemur bullið um sjálfboðavinnu þegar allt eigið fé er gjöf frá Guðmundi Árna (Stefánssyni, fyrrum bæjarstjóra). Samt áhugavert að þeir skulda 630mkr. Ég vissi ekki að þeir væru í svona vondum málum.“
Ljóst er á öllu að bréf Viðars hefur vakið mikla athygli og að greinilegt að gamli rígurinn á milli FH og Hauka lifir enn góðu lífi.