Samantha Ford fékk tíu ára fangelsisdóm árið 2017 fyrir morðin á börnunum sínum tveimur. Hún var vistuð á geðspítala þar sem hún átti að liggja þar til að hún yrði talin hæf til þess að sitja inni í fangelsi. Nú tæpum fimm árum eftir morðin hræðilegu er ljóst að Samantha mun ganga laus í enda desember næstkomandi, án þess að hafa stigið fæti inn fyrir fangelsisdyrnar.
Tvíburarnir Jake og Chloe voru rétt að verða tveggja ára þegar móðir þeirra drekkti þeim í baðkari á heimili fjölskyldunnar. Hún neitaði fyrir morðin, þrátt fyrir að lögregla hafi fundið sannanir þess að hún hafi leitað uppi „hvernig á að drekkja einhverjum“ á Google. Faðir barnanna segir fyrrum konu sína vera illgjarna og slóttuga. Hann deildi færslu á Twitter reikningi sínum þar sem hann greindi frá því að Samantha yrði frjáls ferða sinna þann 26.desember næstkomandi. Steven segist viss um að hún hafi spilað á kerfið til þess að fá sínu framgengt.
Samantha og Steven áttu tvíburana með aðstoð tæknifrjóvgunar en hann segir börnin vera kraftaverk eftir mörg ár af árangurslausum tilraunir til barneigna. Fimm tilraunir af tæknifrjóvgun voru gerðar áður en Samantha varð ófrísk af tvíburunum. Eftir tíu ára hjónaband sótti Steven um skilnað. Samantha gerði ítrekaðar tilraunir til þess að sannfæra Steven um að halda hjónabandinu áfram og sendi honum meðal annars skilaboð þar sem hún sagði að „þetta myndi enda illa fyrir hann“ ef honum snerist ekki hugur. Verjandi Samönthu sagði hana hafa glímt við mikið þunglyndi og önnur andleg veikindi sem urðu til þess að hún framdi þennan hræðilega verknað. Steven er ekki sammála þessari fullyrðingu og segir fyrrum eiginkonu sína hafa meðvitað verið að hefna sín á honum.
Samantha reyndi að taka eigið líf eftir morðin, hún keyrði á 200 kílómetra hraða á tré en þegar bráðaliðar komu á vettvang bað hún þá um að leyfa sér að deyja og viðurkenndi að hafa orðið börnunum sínum að bana. Lögregla var þá send á heimili hennar þar sem börnin tvö fundust látin.
Geðmat var gert á Samönthu en læknar sögðu hana ýkja andleg veikindi sín til muna. Hún sýnir einkenni narsisisma.