Kristinn Hrafnsson ritstjóri Wikileaks heldur því fram í nýrri Facebook-færslu að Ísland sé ekki lýðræðisríki nema að nafninu til.
Kristinn er oft gagnrýninn á yfirvöld á Íslandi en í nýjustu færslu sinni segir hann Ísland ekki lýðræðisríki nema að nafninu til. Birti hann mynd sem hann gerði sjálfur, sem útskýrir kenningu hans.
„Ég rek mig á að margir eiga erfitt með að átta sig á þeirri staðreynd að Ísland er ekki lýðræðisríki nema að nafninu til. Dró því upp einfalda mynd til glöggvunar. Flestir finna vitaskuld fyrir merkjunum og verkjunum, en reyndin er sú að stjórnskipanin einkennist af auðræði eða ólígarkisma. Lýðræðið er blekking eða Pótemkin-tjöld sem ætlað er að fela þessa mynd. Það gengur illa.“
Mynd: Facebook
Á sjötta tug manna hefur líkað við færsluna og er sú tala rísandi. Nokkrir þjóðþekktir einstaklingar hafa einnig tjáð sig í athugasemdum við færsluna.
Þar á meðal er Helga Vala Helgadóttir, þingmaður Samfylkingarinnar: „Það sem er í raun verst er hversu samdauna lítið samfélag er. Það er þegar lesnar eru erlendar bækur og erlendar fréttir af svipuðu ástandi og heima að rennur upp fyrir manni að þetta er ekki eðlilegt.“
Jóhann Hlíðar Harðarsson, fyrrum fréttamaður minnist á ESB í svari sínu: „Þetta er helsta ástæða þess að „valdið“ vill ekki sjá Evrópusambandið.“
Þá tjáir Gunnar Smári Egilsson Sósíalistaforingi, sig einnig en aukreitis deilir hann færslu Kristins. „Þetta kallast alræði auðvaldsins. SA og Verslunarráð leggja línurnar, stjórnmálaflokkar og fjölmiðlar hlýða flautinu þaðan. Margir sjá í gegnum þetta en kjósa að þegja og spila með. Andstaðan er of dýr, fólk missir vinnu og orðspor.“