Mannlíf fékk nokkra viðmælendur til að velta fyrir sér björtu hliðunum í veirufaraldrinum, nánar í nýjasta blaði Mannlíf.
Edda Arndal, sérfræðingur í fjölskyldufræðum, segir að skjóstæðingar hennar tali margir um ýmsar jákvæðar hliðar við samkomubannið sem verið hefur. Hún veltir fyrir sér hvort samfélagið hafi fengið að upplifa kosti þess að fólk vinni aðeins minna.
„Mitt fólk talar um hversu rólegra allt er og að samveran sé mun meiri. Þannig minnkar kvíði hjá sumum og ég hef fundið að nærveran hefur í sumum tilfellum verið meðferð sem slík. En hún hjálpar auðvitað ekki til í ofbeldissamböndum og í einhverjum tilvikum er þetta hunderfitt. Allt í einu er meiri fjölskyldusamvera og það getur hjálpað til við að bæta sambönd. Þetta er í mörgum tilfellum miklu fjölskylduvænna,“ segir Edda.
„Með minni vinnu verður samfélagið líka mun fjölskylduvænna og ég heyri fólkið tala um þetta. Allt í einu sé til dæmis æðislegt að foreldrarnir styðji hvort annað með börnin og skyndilega er tími til að gera ýmislegt saman og með börnunum. Þetta hefur líka hvatt okkur til þess að vera í ríkara sambandi við okkar nánustu.“