- Auglýsing -
Björn Birgisson segir að láglaunafólkið í Eflingu hafi fengið minnst út úr kjaradeilingu Eflingar og Samtaka Atvinnulífsins.
Í nýrri færslu talar samfélagsrýnirinn frá Grindavík, Björn Birgisson um kjaradeilu Eflingar við Samtök atvinnulífsins og veltir fyrir sér hverju efling hafi náð fram að endingu. Segir hann karlmenn í félaginu hafa fengið mest út úr miðlunartillögunni en konurnar í Eflingu minnst. Þá segir hann að sökina sé meðal annars að finna í „trúnaðarbroti“ Stefáns Ólafssonar.
„Hverju náði Efling fram?
Olíuflutningabílstjórarnir fá nú 175 krónur fyrir hvern unninn tíma í svokallaðan ADR bónus, en það hefur aldrei verið metið áður að menn séu að aka með hættulegan farm.
Fyrir 40 tíma vinnuviku væru það 28 þúsund krónur á mánuði, en svo bætist mismunandi fjöldi yfirvinnutíma við.
Þannig að Efling náði þessum 28 þúsund krónum aukalega fyrir bílstjórana – ofan á SGS hækkunina.
Þessa hækkun fær fámenn karlastétt, eitthvað um 70 vaskir menn.
**********
Láglaunakonurnar, aðaluppleggið í baráttu Eflingar, hvað fengu þær?
Ofan á SGS hækkunina margnefndu fengu hótelþernurnar 0,58% hækkun á taxta.
Það gætu verið rúmlega 2000 krónur á mánuði.
Af þeirri tölu skýrist líklega trúnaðarbrot Stefáns Ólafssonar, ráðgjafa Eflingar, þegar hann ritaði á Facebook:
„Við dagslok varð það mér umhugsunarefni, hversu lengi fólk sem hefur milljónir í laun á mánuði getur rætt um eitt þúsund króna launahækkun til verkafólks – og það án árangurs!
Aurasálin er vissulega verðugt rannsóknarefni fyrir sálfræðinga!“
**********
Hvað kostaði barátta Eflingar fyrir þessum launahækkunum?
Lausleg ágiskun væri um 200 til 300 milljónir.
Greiðslur úr verkfallssjóði, gjallarhorn, húsaleiga í Hörpu, húsaleiga í Iðnó, auglýsingar og lögfræðikostnaður svo eitthvað sé nefnt.
**********
Niðurstaðan er því þessi.
Láglaunafólkið í Eflingu fékk minnstu hækkunina.
Konurnar í félaginu fengu minnst.
Millitekjuhópur fékk miklu meiri hækkun, í honum eru nánast eingöngu karlmenn.
Tekjubilið jókst.
Þetta er forusta Eflingar tilbúin að skrifa undir.“