Sigurbergur í Fjarðarkaupum er látinn

Sigurbergur Sveinsson kaupmaður í Fjarðarkaupum er látinn, níræður að aldri. Lést hann á Landspítalanum 12. nóvember síðastliðinn.

Sigurbergur fæddist 15. apríl 1933 í Hafnarfirði en hann var sonur Sveins Þorbergssonar og Jónínu Bjargar Guðlaugsdóttur. Frá 6 ára til 15 ára aldurs ólst hann upp að Húsum í Selárdal hjá hjónunum Ólafi Waage og Ingibjörgu Þórðardóttur, að því er fram kemur í dánartilkynningu mbl.is.

Lauk hann landsprófi frá Flensborgarskóla 1952, stúdentspóri frá MR 1955 og úr Háskóla Íslands útskrifaðist hann sem viðskiptafræðingur árið 1962. Frá 1955 til 1968 starfaði Sigurbergur hjá Slökkviliði Keflavíkurflugvallar en hann var orðinn aðstoðarslökkviliðsstjóri er hann lét af störfum.

Árið 1973 stofnaði hann verslunina Fjarðarkaup ásamt eiginkonu sinni, Ingibjörgu Gísladóttur og hjónunum Bjarna Blomsterberg og Valgerði Jónsdóttur. Árið 1993 tóku Sigurbergur og Ingibjörg alveg við rekstrinum auk fjölskyldu sinnar.

Þá var Sigurbergur annálaður íþróttaáhugamaður en hann var einn af stofnendum Golfklúbbsins Keilis. Auk þess var hann stuðningsmaður Knattspyrnufélagsins Hauka, lék borðtennis, stundaði stangaveiði og var fínn skákmaður.

Eig­in­kona Sig­ur­bergs var Ingi­björg Gísla­dótt­ir en þau kynnt­ust árið 1952. Ingibjörg lést árið 2009. Börn þeirra eru Hjör­dís, Rósa, Sveinn og Gísli, barna­börn­in og barna­barna­börn­in eru 24 tals­ins. Eft­ir­lif­andi sam­býl­is­kona hans er Kol­brún Svavars­dótt­ir.

Útför Sig­ur­bergs fer fram frá Víðistaðakirkju miðviku­dag­inn 22. nóv­em­ber kl. 15.