Fjöldi staðfestra COVID-19 smita hér á landi er kominn upp í 1.220 samkvæmt nýjustu tölum á covid.is. Greindum smitum hefur fjölgað um 85 á síðasta sólarhring. 35 sjúklingar eru á sjúkrahúsi vegna veirunnar er fram kemur á covid.is, þar af eru 12 á gjörgæslu.
815 sýni voru rannsökuð á sýkla- og veirufræðideild Landspítalans í gær, 74 reyndust jákvæð. Þá voru 797 sýni rannsökuð hjá Íslenskri erfðagreiningu í gær, 11 þeirra voru jákvæð.
Alls eru 7.822 einstaklingar í sóttkví hér á landi vegna útbreiðslu veirunnar. Samkvæmt tölum covid.is hafa 225 einstaklingar náð bata eftir að hafa smitast.
Almannavarnadeild ríkislögreglustjóra boðar til upplýsingafundar klukkan tvö í dag. Unnur Sverrisdóttir, forstjóri Vinnumálastofnunar, verður gestur fundarins í dag. Mikið álag er á stofnuninni um þessar mundir og mun hún koma upplýsingum áleiðis um helstu verkefni og áskoranir.