Í gær var ráðist á tvo nemendur í efstu deild Austurbæjarskóla með barefli. Var annar þeirra fluttur á bráðamóttöku en hinn á heilsugæslustöð.
Vísir sagði fyrst frá málinu. Þar kemur fram að skólastjórnendur segi að meintur gerandi sé nemandi í skólanum en annar einstaklingur hafi verið með honum í för en að hann sé ótengdur skólanum. Var lögregla og sjúkrabíll kallaður á staðinn og stendur rannsókn lögreglu yfir á málinu.
Sagt var frá árásinni í tölvupósti skólastjóra Austurbæjarskóla, Kristínar Jóhannesdóttur, til foreldra. Kemur þar fram að málið hafi verið tilkynnt til Barnaverndar. Þá segir ennfremur í póstinum að öryggismyndavélar skólans hafi náð hluta atvikisins en árásin var gerð fyrir framan matsal skólans.
Í tölvupóstinum segir að þeir nemendum í 8. til 10. bekk sem og starfsfólki sem urðu vitni að árásinni sé mjög brugðið. Í boði sé áfallahjálp frá fagaðila en einnig geta þau leitað til námsráðgjafa.
Ekki náðist í Kristínu við vinnslu fréttarinnar þar sem hún var á fundi.