Þingmaðurinn Jóhann Páll Jóhannsson segir á Facebokk-síðu sinni að „leyndin yfir greinargerð setts ríkisendurskoðanda um Lindarhvol ehf. er svo farsakennd, illa rökstudd og niðurlægjandi fyrir Alþingi að ég vil helst ekki trúa því að um sé að ræða einkaákvörðun Birgis Ármannssonar þingforseta.“
Segir að fyrir liggji „að þann 22. apríl 2022, skömmu eftir að forsætisnefnd ákvað að birta greinargerðina að fengnu lögfræðiáliti, barst þingforseta bréf úr fjármála- og efnahagsráðuneytinu þar sem höfð eru uppi stór orð og þess krafist að áfram ríki um leynd um málið. Og þar við situr – þrátt fyrir að upplýsingaleyndin sé beinlínis ólögleg samkvæmt óháðu lögfræðiáliti sem forsætisnefnd aflaði við meðferð málsins.“
Jóhann Páll bætir þessu við að endingu:
„Ég var að leggja fram fyrirspurn um þessi afskipti. Að sama skapi beindi ég ítarlegri fyrirspurn til þingforseta um öll samskipti hans við stjórn Lindarhvols ehf. Óska jafnframt eftir upplýsingum um bréf sem fyrrverandi settur ríkisendurskoðandi sendi forsætisnefnd þann 17. febrúar 2021 en þar gerir hann margháttaðar athugasemdir við lokaskýrslu Ríkisendurskoðunar um Lindarhvol ehf.“