Ung kona á rafhlaupahjóli var handtekin skömmu eftir miðnætti í gær. Konan ók á móti umferð á akbraut og endaði á lögreglubifreið sem var kyrrstæð. Engin slys urðu á fólki en eitthvað sá á bílnum eftir slysið. Tekið var blóðsýni úr konunni á lögreglustöð en hún er grunuð um að hafa verið undir áhrifum áfengis eða fíkniefna. Konunni var sleppt úr haldi eftir blóðsýnatökuna.
Skömmu fyrir klukkan átta barst lögreglunni tilkynning um þjófnað í verslun í Kópavogi. Maðurinn sem var grunaður um þjófnaðinn var stöðvaður er hann ætlaði að ganga út úr versluninni. Í ljós kom að hann hafði sett tuttugu smjörstykki í bakpoka sinn, 500 g hvert um sig. Ætlaði maðurinn því að hafa á brott með sér tíu kíló af smjöri.
Manninum tókst ekki ætlunarverk sitt og var vettvangsskýrsla rituð af lögreglu.
Maður var handtekinn í verslun í hverfi 105 í nótt. Maðurinn var ofurölvi og hafði ætlað að stela vörum úr versluninni. Flutti lögregla manninn niður á lögreglustöð þar sem hann gistir fangaklefa vegna ástands.
Fjórir ökumenn voru stöðvaðir af lögreglunni í gærkvöldi og nótt. Grunur leikur á að þeir hafi ekið undir áhrifum áfengis eða fíkniefna.