Eins og Mannlíf greindi langfyrst frá allra fjölmiðla á Íslandi, þá hefur Guðlaugur Þór Þórðarson ákveðið að taka slaginn við Bjarna Benediktsson sitjandi formann Sjálfstæðisflokksins, um næstu helgi; þá fer fram landsfundur flokksins.
Guðlaugur Þór tilkynnti opinberlega um framboð sitt til formanns Sjálfstæðisflokksins rétt í þessu; gerði það í troðfullri Valhöll og undir dynjandi lófaklappi.
Sagði hann einfaldlega að kominn væri tími til að hætta að fagna svokölluðum varnarsigrum, og sækja fram:
„Sjálfstæðisflokkurinn á ekki að sætta sig við að vera stærsti flokkurinn – Sjálfstæðisflokkurinn á að vera langstærstur.“
Ljóst er að framundan er hörkuslagur um formannssætið á milli sitjandi formanns, Bjarna Benediktssonar, sem setið hefur á stóli formanns flokksins í 13 ár, og Guðlaugs Þórs, en landsfundur flokksins fer fram um næstu helgi, eins og áður sagði. Verður það fyrsti landsfundur Sjálfstæðisflokksins í fjögur og hálft ár.