Dómur er fallinn í meiðyrðamáli Björns Matthíassonar, hagfræðings, sem hann höfðaði gegn öðrum ritstjóra Stundarinnar, Ingibjörgu Dögg Kjartansdóttur og útgáfufélagi Stundarinnar vegna viðtals sem birtist í blaðinu við dætur Björns. Í því sökuðu dæturnar föður sinn um kynferðislegt ofbeldi.
Fór Björn fram á fimm milljónir í bætur.
Sjá einnig: Dætur saka Björn um misnotkun – Hann vill milljónir frá Stundinni
Stundin var sýknuð í öllum atriðum málsins, en var henni þó gert að greiða málskostnað.
Í niðurskurði dóms kemur fram að það „sérstaka og mikilvæga hlutverks sem fjölmiðlar gegna í lýðræðissamfélagi við að taka á móti og miðla upplýsingum til almennings, svo og að vera vettvangur umræðu um mikilvæg þjóðfélagsleg málefni. Leiðir af þessu að játa verður fjölmiðlum ríkt svigrúm til að gera grein fyrir málum sem erindi eiga við almenning, þar á meðal sakamálum sem einhverra hluta vegna hefur dagað uppi eða lokið án ákæru og sakfellingar.“
Í viðtalinu, sem birtist í blaði Stundarinnar þann 9. nóvember 2018, komu systurnar fram nafnlaust og sögðu að faðir þeirra hefði misnotað þær sem börn. Ekki var greint frá nafni föðurins, en ýmsar upplýsingar komu fram sem gáfu vísbendingar um hver maðurinn væri.
Ingibjörg Dögg fagnar sigrinum á Facebook síðu sinni:
„Ég hef auðvitað séð breytinguna sem hefur orðið á meiðyrðamálum frá því sem áður var, en það er ákveðinn léttir að upplifa það líka á eigin skinni að nú eru dómstólar farnir að verja tjáningarfrelsi fjölmiðla með mjög afgerandi hætti.“
Ítarlegt viðtal Mannlífs við Björn birtist í síðasta mánuði. Viðtalið má lesa hér.