Í febrúarmánuði árið 2002 fannst 51 árs gamall strætisvagnabílstjóri, og fyrrverandi blaðamaður, Bragi Óskarsson, látinn á Víðimel í Vesturbæ Reykjavíkur. Lát hans hafði augljóslega borið að með hrottalegum hætti en hann hafði fengið fjölmörg högg í höfuð og andlit af völdum kjötexis, slaghamars og sveðju, eins og síðar kom fram í skýrslu réttarmeinafræðings.
Ekkert hafði Bragi til saka unnið nema að vera svo ógæfusamur að vera á röngum stað á röngum tíma.
Sömu nótt var brotist inn á dekkjaverkstæði við Ægisíðu og leiddu vísbendingar úr innbrotinu lögreglu til banamanns Braga. Var það meðal annars um lífsýni að ræða.
Tvær milljónir í kókaín
Í ljós kom að morðinginn var hinn 24 ára gamli Þór sem var þá um nóttina á þvælingi um Vesturbæinn eftir partýhöld og ferðir um vínveitingahús borgarinnar. Þór hafði þá ekki sofið svo dögum skipti vegna gríðarlegrar fíkniefnaneyslu og hafði meðal annars keypt kókaín fyrir tvær milljónir króna vikurnar á undan, svo djúpt var Þór í fastur í fíkninni. Þór var staddur í Vesturbænum í peningaleit til að fjármagna frekari fíkniefnakaup og ákvað að brjótast inn á dekkjaverkstæðið, vopnaðuð exi, hamri og sveðju.
Það var svo fyrir tilviljun eina að Þór rekst á Braga í Víðimelnum en Bragi var þá á heimleið. Þór er einn til frásagnar um árasina en svo virðist sem æði af völdum fíkniefnaneyslu hafi runnið á hann sem varð til þess að hann réðist af slíkri heift á Braga að hann lést að völdum sára sinna. Játaði Þór verknaðinn við handtöku og vísaði lögreglu á morðvopnin og blóðug föt í ruslatunnu rétt við morðstaðinn.
Eftir morðið mun Þór hafa haldið á fund félaga sinna í Austurbergi í Breiðholtinu. Fékk hann einum þeirra 40 þúsund krónum í seðlum og nokkur þúsund peseta, afraksturinn af innbrotinu í dekkjaverkstæðið. Kvaðst hann ennfremur „dálítið hafa komið upp á og hann hefði drepið mann”. Félagarnir gáfu lítið fyrir það og héldu út að kaupa meira af fíkniefnum.
Það er síðan um morgunin að einhver partígesta kveikir á sjónvarpinu og sér þar frétt um að lík karlmanns hafi fundist á Víðimelnum. Var þá Þóri trúað.
Hræðilegar afleiðingar neyslu
Geðlæknir sem rannsakaði Þór taldi hann vera sakhæfan. Fram kemur í dómnum að það sé álit læknisins að Þór ætti ekki við geðsjúkdóma að stríða og ekki væru undirliggjandi neinir persónuleikabrestir. Hann væri ungur maður með ágætar gáfur og marga góða hæfileika, rólegur, en hefði byrjað ungur að drekka áfengi og hafi ánetjast fíkniefnum fyrir um tveimur árum og farið fljótt í mikla fíkn.
Verknaðurinn hefði verið framinn undir áhrifum vímunnar. Þreyta og ofskynjanir hefðu gert Þór að banamanni. Fyrir dómi kom fram að hann hefði fengið meðferðarmöguleika á Vogi, sem hann hefði ekki ráðið við og sennilegast ekki verið tilbúin til að takast á við. Geðlæknir sagði það vera ef til vill óvanalegt við mál Þórs að um hafi verið að ræða tiltölulega stutta neyslusögu af alvarlegum fíkniefnum, og einnig það að ekki séu neinir alvarlegir persónuleikabrestir undirliggjandi hjá honum. Hér væri því um að ræða hræðilegar afleiðingar þess sem geti orðið þegar menn séu í mikilli neyslu. Sagði læknirinn ólíklegt að Þór myndi fremja viðlíka glæp væri hann ekki undir áhrifum fíkniefna.
Ekki öllum spurningum svarað
Ýmsum spurningum var hins vegar ósvarað varðandi morðið, til að mynda voru skóför við líkið sem ekki var unnt að rekja og ljóst var að líkið hafði verið hreyft til. Aldrei voru þó fleiri en Þór grunaði um að bana Braga. Sjálfur sagðist Þór muna gloppótt eftir atburðunum, lítið sem ekkert um árásina sjálfa en einhver atriði eftir það. Sérfræðingur kvað fyrir dómi ekki útilokað að þar væri um sjálfvalið minnisleysi að ræða.
Héraðsdómur Reykjavíkur dæmdi Þór til 16 ára fangelsisvistar þann 8. janúar 2003 á grunni rannsóknargagna og skýlausrar játninga auk þess sem honum var gert að greiða móður Braga eina og hálfa milljón króna í skaðabætur.
Þór hefur náð tökum á lífi sínu og hefur ekki komist í kast við lögin síðan þetta gerðist. Hann er fjölskyldumaður og lifir í dag reglusömu lífi og hefur menntað sig sem íþróttafræðingur.