18 ára unglingspiltur var stunginn þrisvar sinnum síðdegis í gær; átti árásin sér stað í undirgöngum við Sprengisand í Reykjavík.
Margeir Sveinsson aðstoðaryfirlögregluþjónn hjá lögreglunni á höfuðborgarsvæðinu staðfesti þetta við fréttastofu RÚV.
Var unglingspilturinn, sem er með þroskaskerðingu, á leið sinni á íþróttaæfingu þegar ráðist var að honum og reynt að stela af honum hjóli.
Í kjölfarið var drengurinn stunginn þrisvar sinnum með hníf. Hann var fluttur með hraði á gjörgæslu þar sem hann fór strax í skurðaðgerð; sem betur fer er hann ekki talinn í lífshættu.
Árásarmaðurinn hefur verið handtekinn, og úrskurðaður í gæsluvarðhald til 12. október.