Flatbrauð með jógúrtsósu, lambakjöti og ætum blómum

Efnisorð

Deila

- Auglýsing -

Ákveðnar tegundir sumarblóma eru ekki bara til prýðis, þær eru ætar og bragðgóðar líka eins og þessi uppskrift sannar.

 

Flatbrauð með jógúrtsósu, lambakjöti og ætum blómum

6 flatbrauð

Flatbrauð

125 g hveiti
120 g heilhveiti
2 tsk. salt
½ tsk. lyftiduft
250 g hrein jógúrt
ólífuolía

Blandið þurrefnunum saman í stórri skál og búið til holu í miðjunni, hellið jógúrtinni ofan í holuna og blandið öllu saman með sleif. Ef deigið er of þurrt má bæta við 1 msk. af jógúrt í einu þar til deigið samlagast.

Flytjið yfir á hveitistráðan flöt og hnoðið þar til deigið verður slétt, u.þ.b. ½ – 1 mín. Skiptið deiginu í sex hluta og látið það hvíla í 15 mín. Fletjið það út með kökukefli og hitið pönnu yfir háum hita eða hitið grill að háum hita. Penslið deigið með smávegis ólífuolíu og steikið á pönnunni þar til það gyllist og verður stökkt, snúið því við og steikið í 1-2 mín. til viðbótar.

Setjið flatbrauðið til hliðar og endurtakið með afganginum af deiginu. Brauðið er best skömmu eftir eldun.

Ofan á

300 g grísk jógúrt
1 hvítlauksgeiri
½ tsk. salt
¼ tsk. pipar
20 g steinselja, gróft skorin
lambakjöt, t.d. lambainnralæri eða afgangur af lambalæri eða -bóg
1 hnefafylli klettasalat
200 g kirsuberjatómatar, skornir í tvennt og fernt
æt blóm, t.d. blóm af graslauk og fjólum
60 g bláber

Hrærið jógúrtina í skál og rífið hvítlauksgeira á rifjárni ofan í eða þrýstið í gegnum hvítlaukspressu. Saltið og piprið og smakkið til. Setjið til hliðar og blandið síðan steinseljunni saman við rétt áður en raðað er á flatbrauðið.

Grillið lambakjötið yfir háum hita í 4-5 mín. á hvorri hlið og grillið þar til kjarnhiti kjötsins nær 58°C. Látið hvíla í 15 mín. áður en kjötið er skorið í sneiðar. Smyrjið jógúrtsósunni ofan á brauðin, sáldrið klettasalati yfir, raðið lambakjötssneiðum ofan á og skreytið með ætum blómum, kirsuberjatómötum og bláberjum. Berið strax fram.

Umsjón / Bergþóra Jónsdóttir og Nanna Teitsdóttir
Mynd / Hallur Karlsson

- Auglýsing -

Athugasemdir

Lestu meira