Kaffikaka með mokkakremi

Fátt er yndislegra en að bjóða upp á nýlagaða tertu þegar gesti ber að garði. Kaffi er einstaklega gott í bakstur og góð tilbreyting frá marens eða súkkulaði. Hér er ein sérlega bragðgóð og einföld uppskrift sem tilvalið er að skella í um helgar.

Mynd / Hákon Davíð Björnsson

Kakan
12-14 sneiðar

200 g smjör, mjúkt
200 g sykur
3 egg, stór
200 g hveiti
1 tsk. lyftiduft
1 ½ msk. skyndikaffi leyst upp í 1 msk. af vatni

Hitið ofninn í 180°C. Hrærið smjör og sykur saman þar til það er ljóst og kremkennt. Bætið eggjum út í, einu í einu, og hrærið vel saman. Bætið hveiti, lyftidufti, og uppleystu kaffi út í og hrærið allt vel saman. Smyrjið 2 form, 22-24 cm breið, og skiptið deiginu í þau. Bakið í miðjum ofni í 25-30 mín. Kælið botnana. Leggið botnana saman með smjörkremi og setjið glassúrinn ofan á.

AUGLÝSING


Krem
100 g smjör, mjúkt
220 g flórsykur, sigtaður
2 tsk. skyndikaffiduft leyst upp í 2 tsk. af vatni

Hrærið allt vel saman.

Glassúr
180 g flórsykur, sigtaður
2 tsk. skyndikaffiduft
1 ½ msk. sjóðandi vatn

Hrærið allt vel saman. Bætið vatni í ef þarf til að fá hæfilega þykkan glassúr.

Texti / Sigríður Björk Bragadóttir
Stílisti / Ólöf Jakobína Ernudóttir

Ekki missa af þessum

Annað áhugavert efni