Karlmaður á fertugsaldri fannst látinn í Amazon-fljóti eftir að tveir bátar rákust saman á laugardaginn. Þremur var bjargað skömmu eftir slysið en tveggja manna var enn saknað. Það var þá morguninn eftir sem lík Joney Jose Silva da Luz (38) fannst en hafði hann verið étinn af pírana fiskum. Þá segir í frétt Mirror að líkið hafi verið illa farið eftir fiskana sem eru grimmir.
Eiginkona Silva da Luz var ein þeirra þriggja sem lifðu slysið af en Wagner Silva, farþega á öðrum bátnum er enn saknað. Alvarlegar árásir pírana fiska eru heldur sjaldgæfar á þessum slóðum en slík árás átti sér síðast stað í nóvember árið 2021. Þar hafði þrítugur veiðimaður stokkið út í vatnið til þess að forðast býflugur en varð það til þess að fiskarnir veittust að honum og urðu honum að bana. Áætlað er að um 30 tegundir pírana fiska búi í vötnum og ám Suður-Ameríku en fiskarnir hafa eitt sterkasta bit fiskategunda.