Flutningaskipi með vörusendingu frá Síldarvinnslunni í Neskaupsstað á leið til Odessa var snúið við er Rússar réðust inn í Úkraínu. Gengi bréfa í Síldarvinnslunni hefur fallið undanfarna daga sökum innrásar Rússlands í Úkraínu.
Samkvæmt tilkynningu fyrirtækisins til Kauphallarinnar í gærmorgun og Austurfrétt sagði frá, var vörusending á leið til Odessa snarlega stöðvuð og skipinu snúið við um leið og fréttist af innrás Rússlands.
Segir í tilkynningunni að Úkraína hafi verið eitt þýðingamesta viðskiptaland Síldarvinnslunnar síðustu ár og að þangað sé selt mikið af makríl, loðnu og síld. Úkraína hefur keypt um 33% frosinna uppsjávarafurða undanfarin ár og enn meira þau ár sem loðnan var ekki veidd.
Af þessum sökum fylgjast stjórnendur Síldarvinnslunnar náið með þróun innrásarinnar. Útistandandi viðskiptakröfur fyrirtækisins í landinu eru nú um 1,1 milljarður króna en auk þess eru loðnubirgðir ætlaðar Úkraínumönnum í geymslum Síldarvinnslunnar. Ekki ku vera hægt að áætla áhrifin á reksturinn sem hljótast af innrásinni.
Odessa er ein af þeim borgum sem orðið hefur fyrir loftárásum Rússa og var flutningaskipi á leið þangað með birgðir, snúið við fyrir helgi og siglir nú aftur til Neskaupsstaðar.
Síldarvinnslan segir í tilkynningu að hún harmi stríðsátökin og að hugur Síldarvinnslufólks sé hjá Úkraínskum viðskiptavinu sem og öllu fólkinu í landinu. „Öll fordæmum við þær gegndarlausu árásir sem úkraínska þjóðin er að verða fyrir.“