Nýjasta skip íslenska flotans, Margrét EA 70, landaði fyrsta farmi sínum á Eskifirði á sunnudag en það voru 2000 tonn af loðnu.
Fram kemur í frétt Austurfréttar að skipið hafi verið smíðað í Noregi árið 2008 en kom hingað til lands frá Skotlandi en þar hét það Christina S. Síðastliðinn miðvikudag kom skipið til Reykjavíkur og í kjölfarið var hafist handa við að uppfylla öll tilskilin leyfi samkvæmt íslenskum reglugerðum um fiskiskip.
Á föstudagsmorgun lagði Margrét af stað í loðnumiðin út af Reykjanesi og aðeins nokkrum klukkustundum eftir að hún var komin á miðin var búið að dæla úr nótum fjögurra skipa um borð í Margréti. Hún sigldi svo með hráefnið austur á Eskifjörð til vinnslu.
Samherji á skipið en á vef fyrirtækisins er viðtal við skipstjóra Margrétar, Hjört Valsson, sem sagði að ferlið allt hefði gengið framar vonum. „Allt var klappað og klárt síðdegis á fimmtudeginum en mín bjartsýnasta spá var að það yrði hugsanlega við lok föstudagsins, þannig að þetta gekk allt saman vonum framar. Það eru fjölmargir þættir í ferlinu sem þurfa að ganga upp en með góðri og þéttri samvinnu allra tókst að ljúka þessu á innan við tveimur sólarhringum og halda á miðin út af Reykjanesi. Skipið fór frá Skotlandi á sunnudegi og innan við viku síðar er sem sagt landað hérna á Eskifirði. Geri aðrir betur segi ég nú bara. Loðnuvertíðin er líklega á lokametrunum, þannig að hver sólarhringur er dýrmætur.“