Karlmaður hefur verið ákærður fyrir tilraun til manndráps en hann er sagður hafa ráðist hrottalega á eiginkonu sína á hótelherbergi á Hótel Borg. RÚV greinir frá þessu.
Maðurinn er sagður hafa stappað ítrekað á hægri hlið hennar með þeim afleiðingum að konan hlaut rifbrot, mar á lifur og lunga, áverkaloftbrjóst og áverkahúðbeðsþembu.
Athygli vekur að málið virðist ekki hafa ratað í fjölmiðla fyrr en nú. Einnig vekur athygli að ákæra virðist hafa verið gefin út frekar skjótt, en maðurinn er samkvæmt RÚV enn í gæsluvarðhaldi. Þinghald er lokað svo ljóst er að nokkur leynd verður áfram yfir málinu.