Í bréfi frá stjórn foreldrafélags Breiðagerðisskóla til Íbúaráðs Háaleitis og Bústaða kemur fram að stórhætta skapist á hverjum degi við skólann og leikskólann Jörfa við Hæðargarð. Foreldrafélagið segir í bréfinu frá hraðakstri í hverfinu og tók Íbúaráð undir bréfið.
„Borið hefur á því að bílstjórar auki hraðann mikið á milli hraðahindrana og taki jafnvel fram úr bifreiðum sem keyra á löglegum hraða,“ segir meðal annars í bréfi foreldrafélagsins en Íbúaráð hefur hvatt skipulags- og samgönguráð borgarinnar til að taka erindið til greina eins fljótt og auðið er og efla umferðaröryggi.
Hámarkshraði í Hæðargarði er 30 kílómetrar á klukkustund en mælingar lögreglu hafa sýnt og sannað að um helmingur bílstjóra keyra of hratt um götuna. „Öryggi gangandi vegfarenda hlýtur að vega þyngra en hagsmunir ökumanna af því að komast örlítið hraðar á milli staða,“ segir þá í bréfi Íbúaráðs til borgarinnar og leggja þau til að bæta við hraðahindrunum eða loka götunni á móts við leikskólann.
Fréttablaðið greindi fyrst frá málinu