Héraðsdómur Reykjavíkur dæmdi Magnús Aron Magnússon í 16 ára fangelsisvist fyrir manndráp af ásetningi, í dag. Var hann sakfelldur fyrir að hafa banað Gylfa Bergmanni Heimissyni í júní á síðasta ári.
Samkvæmt Vísi var Magnúsi einnig gert að greiða bætur upp á rúmar þrjátíu milljónir króna til föður, systkina og barna Gylfa. Hæstu einstöku bætur til barns, voru dæmdar upp á rúmar 10 milljónir króna.
Saksóknari málsins, Arnþrúður Þórarinsdóttir segir að dómurinn hafi verið eftir væntingum.„Þetta var eftir því sem saksóknari lagði upp með. Bæði hvað varðar um hvaða brot er að ræða. Manndráp af ásetningi og líka varðandi refsilengdina,“ segir Arnþrúður.
Neitaði Magnús Aron sök í málinu en verjandi hans fór fram á að hann yrði einungis dæmdur fyrir líkamsárás sem leiddi til andláts.
Dánarorsök Gylfa voru af völdum heilablæðingar sem og áverka á andliti sem torvelduðu öndun. Læknar gáfu skýrslu fyrir dóminum og lýstu árásinni sem því ofsafyllsta sem sést í árásum þar sem ekkert áhald er brúkað.
Dómskvaddir geðlæknar gerðu grein fyrir mati sínu á Magnúsi við aðalmeðferð málsins en var hann metinn sakhæfur. Geðlæknarnir sögðu þó að sterkur grunur léki á um að hann væri á einhverfurófinu eða að hann hafi þróað með sér persónuleikaröskun vegna ofbeldis og vanrækslu í æsku. Reynt var að svara því í réttarhöldunum, hvort refsing myndi bera árangur sökum þeirra áskorana sem Magnús Aron glímdi við en geðlæknarnir voru sammála um að hegðun hans hefði skánað í fangelsinu.