Tryggvi Tjaldur hefur enn ekki lært umferðareglurnar þrátt fyrir háan aldur. Mannlíf hefur á síðustu dögum fjallað um Tjaldinn Tryggva, sem kemur að hverju vori í Ármúlann en það hefur hann gert frá árinu 1990 og er orðinn sannkallaður vorboði. Mannlíf hefur einnig verið í sambandi við fugla sérfræðing vegna Tryggva.
Í gær barst Mannlífi ábending vegna uppátækja Tryggva, sem ráfaði út á götu um sjö leytið í gærmorgun. Maðurinn sem sendi ábendingunna sagði Tryggva hafa verið „ofur svalann“ en svo svalur var hann að litlu mátti muna að keyrt hefði verið á hann. Sem betur fer var engin umferð á þessum tíma og maðurinn greinilega prýðis ökumaður.
„Ég var næstum því búinn að keyra á hann, en ég með mínar góðu hreyfingar gat nelgt niður,“ sagði maðurinn og bætti við að Tryggvi hafi lítið kippt sér upp við bílinn og hélt áfram göngu sinni niður Vegmúlann. Tryggvi hefur enn ekki litið við korninu sem hefur verið sett á gluggasilluna en mun Mannlíf halda áfram að segja frá ævintýrum Tjaldsins Tryggva, sem eflaust uppáhalds nágranni þeirra sem starfa í Ármúlanum.