Sanna Magdalena Mörtudóttir brestur í grát í myndbandi Sósíalistaflokks Íslands þar sem hún ræðir reynslu sína af húsnæðismálum sem barn og fullorðin.
Sanna er borgarfulltrúi Sósíalistaflokksins í borgarstjórn Reykjavíkur.
Myndbandið var birt á Facebook síðu flokksins með yfirskriftinni:
„Annað tilboð Sósíalista til kjósenda vegna þingkosninga 25. september næstkomandi er Stóra húsnæðisbyltingin. Tilboðið er sprottið úr óþolandi ástandi í húsnæðismálum.“
Í myndbandinu segist Sanna sjá sig sem uppkomið fátækt barn og segir frá íbúðaflakki hennar og móður sinnar þegar hún var barn.
Móðir hennar vann sem leikskólakennari og eftir fullan vinnudag á leikskólanum, vann hún á tímabili einnig við að skúra þar. „Og bara sama hvað þá voru þessi laun ekkert nóg,“ segir Sanna í myndbandinu.
Sanna segir það hafa reynst móður hennar erfitt að finna íbúð sem hún hefði ráð á og því hafi hún sótt um félagslegt leiguhúsnæði.
Segir Sanna sögu þeirra mæðgna vel geta átt við stöðu fólks í dag, því mikill húsnæðisvandi sé enn til staðar.
Myndbandið má sjá hér að neðan.