Mikið hefur verið fjallað um mál læknisins Skúla Tómasar Gunnlaugssonar, en lögreglan á Suðurnesjum rannsakar nú sex andlát á Heilbrigðisstofnun Suðurnesja sem megi ætla að hafi verið ótímabær; borið að með saknæmum hætti.
Þrátt fyrir ákærurnar á hendur Skúla og lögreglurannsóknina hefur hann ekki misst leyfi sitt sem læknir; en einnig eru til rannsóknar meðferð fimm annarra sjúklinga þar sem rökstuddur grunur sé um að hafi verið skráðir í lífslokameðferð að ástæðulausu, og lífi þeirra með því ógnað.
Minna hefur verið fjallað um þá staðreynd að annar læknir liggur einnig undir grun í þessu máli, en nafn Skúla hefur margoft komið fram í tengslum við þessa rannsókn.
Samkvæmt öruggum heimildum Mannlífs þá heitir læknirinn sem er einnig grunaður, hefur stöðu sakbornings í málinu, Sigurður Árnason og er hann krabbameinslæknir og sérfræðingur í líknarmeðferð.
Til rannsóknar í málinu er þáttur Sigurðar, og skylt að taka það fram að hann hefur ekki verið fundinn sekur – og ekkert víst á þessari stundu hvort það gerist;
Sigurður hefur stöðu sakbornings og hefur ekki verið sviptur læknaleyfi sínu frekar en Skúli.
Rannsóknin sem snýr að Sigurði tengist einu andláti.
Tekið skal fram að þáttur Sigurðar í málinu – rannsókninni – er ekki tekinn sérstaklega fyrir í skýrslu landlæknis – en Sigurður var í hlutastarfi hjá HSS.
Mál þetta hefur vakið mikla athygli og mikinn óhug í samfélaginu, enda um að ræða sex andlát sjúklinga og líf og heilsa fimm annarra sjúklinga.
Rannsókn málsins er í fullum gangi.