Menntaskólinn í tónlist glímir við alvarlegt COVID-smit og eru allir sem voru í húsakynnum skólans fyrir helgi hvattir til að fara í skimun. Freyja Gunnlaugsdóttir, aðstoðarskólastjóri og yfirmaður klassísku deildarinnar, er veik af COVID og því margir kennarar í sóttkví.
Í tölvupósti til nemenda kemur fram að líðan Freyju sé eftir atvikum. „Við hvetjum alla sem voru í Skipholti 33, 3.hæð á fimmtudag og föstudag til þess að vera vakandi fyrir einkennum og fara í skimun ef vart verður við einkenni. Smitrakningateymi almannavarna hefur nú þegar verið í sambandi við alla sem ástæða þykir til að fari í sóttkví,“ segir í tölvupóstinum.
Skólastjórnendur segja að þetta sýni mikilvægi þess að huga að sóttvörnum. „Þessi uppákoma minnir okkur öll á mikilvægi þess að fara varlega og huga að persónulegum sóttvörnum í hvívetna. Sameiginlegt markmið okkar er að halda skólanum opnum en um leið að gæta að öryggi allra sem að honum koma. Við sendum Freyju og fjölskyldu hennar hlýjar hugsanir og batakveðjur. Förum varlega, pössum okkur sjálf og aðra!“