2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

Eldsvoði á Akureyri: Maður borinn út úr brennandi húsi

Allt tiltækt slökkvilið á Akureyri hefur verið kallað út vegna elds í einbýlishúsi við Hafnarstræti 37 á Akureyri. Hátt í þrjátíu manns vinna nú að því að ráða niðurlögum eldsins.

„Það hefur einum manni bjargað út úr húsinu og fluttur á sjúkrahús. Við vitum ekki hver líðan hans er,” sagði Vigfús Bjarkason, varðstjóri Slökkviliðsins á Akureyri, í samtali við Mannlíf rétt í þessu og bætir við að ekki sé vitað til þess að fleiri séu í húsinu.

Slökkviliðið hefur verið kallað út vegna bruna í þriggja hæða einbýlishúsi við Hafnarstræti 37. Slökkviliðið, lögregla og sjúkrabílar eru nú á svæðinu og er búið að rýma húsnæði í grennd við húsið sem er alelda að sögn varðstjórans og ónýtt.

„Þetta er eitt bárujárnsklætt hús á þremur hæðum,“ lýsir hann fyrir blaðamanni. „Við erum í þessum töluðu orðum að vinna í því að rífa þakið og reyna að komast að eldinum og slökkva hann.“

AUGLÝSING


Vigfús segir að á þessari stundu sé ekki vitað hver upptök eldsins séu og heldur ekki hvenær kviknaði í, en þetta sé annar stórbruninn á Akureyri á skömmum tíma.

„Það er stutt síðan kviknaði í álíka stóru húsi við Norðurgötu, því miður,“ segir hann og getur þess að í því tilviki sé ekkert vitað um eldsupptök.

Mannlíf hefur heimildir fyrir því að húsið sem um ræðir sé bárujárnshús byggt um þarsíðustu aldamót, eða árið 1901. Húsið sé hluti af gamla bænum. Gamla keiluhöllin hafi á árum áður verið beint á móti húsinu.

Slökkviliðið hélt áfram störfum í nótt

Slökkvilið Akureyrar birti færslu á Facebook í gærkvöldi klukkan 23.35. Þar kom fram að slökkviliðið væri enn að störfum á vettvangi. Talið var að búið væri að slökkva allan eld en enn var hiti og reykur í húsinu og útlit fyrir að unnið yrði þar áfram í nótt.

Jafnframt var greint frá því að um væri að ræða tveggja hæða timburhús á steyptum kjallara, eitt af eldri húsum bæjarins, byggt 1903, í gamalgrónu hverfi á Akureyri. Nágranni hefði tilkynnt að eldur væri kominn upp í húsinu á áttunda tíma í gærkvöldi.

Ekkert lá fyrir um upptök hans þá og talið ólíklegt að hægt yrði að hefja rannsókn fyrr en í dag.

Fréttin hefur verið uppfærð.

Lestu meira

Annað áhugavert efni

Nýjast á Mannlíf.is

Nýjast á Gestgjafanum